RECOMENDACIÓN DE CONTOS PARA SAMAÍN.

RECOMENDACIÓN DE CONTOS PARA O SAMAÍN

Nesta nova entrada queremos recomendarvos algúns títulos cun nexo en común, o medo. Deixámosvos un listado de contos axeitados para traballar o medo e, nas datas nas que estamos, a celebración do Samaín. Todos eles son axeitados para traballar con nenos e nenas de 3, 4 e 5 anos, ainda que... debemos ter en conta que uns dan máis medo que outros, e que debemos xestionar ben "como o contamos" a sabendas dos nenos e nenas ante os que nos atopamos.

A BRUXA REGAÑADENTES.

A bruxa regañadentes é un conto de OQO editora escrito por Tina Meroto. Trátase do conto máis terrorífico de todos os que imos citar nesta nova entrada. A bruxa regañadentes vive nunha casa vella no medio do monte. Unha noite fría e escura recibirá a visita de tres nenos... que non saben ben onde se meten. Ademáis da portada do conto, deixámosvos o video-conto elaborado pola CRTVG e OQO para a coleción Os contos do camiño.

A FIGUEIRA DE PELOSTORTOS

OQO é a editora de A figueira de Pelostortos, un conto de Ana García Castellano e Mikel Mardones. Pelostortos é un home de terrorífica presencia, que custodia unha figueira da que afasta a todos os nenos/as a través da ameaza e o medo. Chegará un día en que os nenos lle fagan sentir ese mesmo medo ó propio Pelostortos.

Deixámosovos ademáis da portada do conto, dous videos onde se narra este conto. O primeiro realizado polo CPI Uxío Novoneira, e o segundo, unha animación con plastilina do CEIP Ponzos.


SEÑOR RAMÓN E SEÑORA RAMONA

Beatriz Montero e Leire Salaberría son as creadoras de "O señor Ramón e a señora Ramona" editado por OQO. Trátase dun conto no que se narra a historia dunha parella que atopándose na cama, escoitou un misterioso ruído que proviña da cociña... Que medo!! Que sería ese ruído?
Deixámosvos a portada do conto e 3 videos. Neles poderemos atopar un videoclip creado polo CEE Vilagarcía de Arousa, unha curtametraxe muda versionando o conto, e un contacontos desta historia.


CARABUÑAS

"Carabuñas" de OQO e creado por Margarita del Mazo e Charlotte Pardi, narra as aventuras e tamén desventuras dun monstruo chamado Carabuñas. Carabuñas é o terror das noites, nas que lle encanta baixar ás vilas dende a súa casa no monte, para comer nenos e nenas. Todo cambia a noite en que coñece a unha pizpireta rapaza que lle dará a volta ó conto.
Deixámosvos a portada do conto, asi como o video-conto elaborado polos rapaces do CEIP Coirón de Dena.


A MIN NON ME COMAS

"A min non me comas" de Margarita del Mazo e Vitali Konstantinov e editado por OQO, narra a historia dun neno moi valente que xa está farto dun monstruo que visita cada poucas horas a súa habitación.


FIZ, O COLECCIONISTA DE MEDOS

Este conto obra de Fina Casalderrey e Teresa Lima e editada por OQO, narra a historia dun neno que decide deixar atrás todos os seus medos. Trátase quizais da máis complexa das obras aqui recollidas. E referímonos por complexa da cara a comprensión dos nenos e nenas de 3, 4 e 5 anos. Será labor do narrador facerllo entender e que o desfruten.


PEGADAS XIGANTES

"Pegadas de xigantes" é a obra de Fernando Krahn para a editora KALANDRAKA. 

A misteriosa aparición dunhas pisadas xigantes na neve da aldea marca o inicio da historia. Unha historia que manterá en vilo ós máis pequenos imaxinando cal pode ser o monstruo xigante que se agocha tras esas pisadas.

 

 

Estas foron algunhas das nosas recomendacións literarias de cara ó Samaín. Agardamos que as desfrutedes. Lémonos na seguinte entrada.

 

ACTIVIDADES SAMAÍN 2017

Durante todo o mes de outubro, os nenos e nenas da nosa aula, estivemos facendo diferentes actividades relacionadas coa celebración do Samaín. Non se tratou tan só de facer obradoiros temáticos relacionados co medo, se non que decidimos facer do medo e do Samaín, o noso centro de interese, o eixo ao arredor do cal xirou a nosa aprendizaxe.

No presente curso a nosa aula atópase estructurada nun total de 4 recantos de traballo, ós que se suman outros 3 que se relacionan cos xerais.

Atopamos na aula un recanto adicado á EXPRESIÓN ARTÍSTICA, outro adicado á LÓXICA MATEMÁTICA, outro adicado ó ACHEGAMENTO Á LECTURA E A ESCRITURA e outro adicado á adquisición de AUTONOMÍA E O DESENVOLVEMENTO DE HÁBITOS.

Estes 4 recantos son os espazos nos que a diario os nenos pasan a maior parte do tempo e por onde rotan cada día da semana. A estes catro espazos súmanse outros 3, o recanto da BIBLIOTECA, o recanto do XOGO e o recanto das TICS. Estes 3 recantos complementan o traballo a desenvolver nos 4 anteriores a diario.

Pero centrémonos no que realmente vimos a tratar... o SAMAÍN. Catro semanas completas ten outubro e 4 semanas decidimos adicar a este centro de interese. Cada semana iniciase coa chegada á aula dun elemento ou dunha personaxe que nos esperta certo medo. A partir deste elemento motivador desenvolveranse durante toda a semana as actividades nos diferentes recunchos.

Os elementos motivadores seleccionados polos nenos/as nunha asamblea na que falamos dos nosos medos foron... os MORCEGO, as MOMIAS, as PANTASMAS e as MEIGAS.

A continuación describimos diferentes actividades desenvoltas a partir dos centro de interese das PANTASMAS e as MOMIAS.

PANTASMAS

1. Recanto dos artistas: Estampación sobre cartulina con esponxa dunha pantasma. Completamos a manualidade escribindo a palabra "pantasma" na base do traballo, e colocandolle os ollos. Non comeza nen remata o traballo coa estampación. Son os nenos/as os encargados de recolectar o material necesario pola aula, verter a pintura, empapar as esponxas... E unha vez rematado o obradoiro, encargaranse de limpar esponxas, platos e mesas, e de reubicar o material empregado no seu lugar de orixe.

2. Recanto da lóxica-matemática: Os nenos/as deste recanto descobren un particular castelo onde viven agochadas unhas pantasmas moi pintorescas. Pintorescas porque son de cores, ainda que a perderon, e debemos axudalas a recuperala. A base da actividade impresa recolle as cores das pantasmas e cantas hai de cada cor. Finalmente facemos reconto xeral de todas as patasmas agochadas no castelo e escribimos o número correspondente na zona indicada.

3.Recanto do achegamento á lectura e a escritura: Recoñecemos na pizarra dixital a palabra PANTASMA entre un pequeno listado onde aparecen outras palabras. Unha vez atopada a palabra indicada, utilizámola como apoio visual para estampar con sellos as diferentes letras que a compoñen. Unha vez completamos a palabra PANTASMA cos sellos debuxámola, sen ningún tipo de modelo de por medio, dando vía libre a que cada neno/a nos ensine como é para el/ela un ser tan misterioso.

4.Recando da autonomía: Os nenos/as teñen a misión de elborar unha misteriosa brebaxe que nos permita convertirnos en pantasmas. Para este fin empregarán xerras, probetas, auga e tinte alimentario. Os rapaces/zas implicados nesta tarefa, deben acudir á zona da aula onde poidan recoller auga e encher as súas xerras. Unha vez de volta á zona de traballo, deben encher as súas probetas ata a medida especificada nun cartón previamente polo mestre, traballando asi diferentes números e distintas cantidades de auga. Unha vez vertida a auga ata a medida exacta, deberán tintar a auga coa cor mencionada no cartón. Unha vez obtidas todas as medidas e cores, deberán facer a mistura final para poder obter a pócima máxica que nos convirta en pantasmas.

MOMIAS

1. Recanto dos artistas: Elaboramos bocatas de momias. Os nenos e nenas empregarán para este obradoiro de cociña creativa... pan de molde, queixo fresco, queixo en lonchas e aceitunas. Para realizar a momima os pasos a dar serán os seguintes:

-Untamos queixo fresco no pan de molde.

-Facemos tiras de loncha de queixo.

-Colocamos as tiras de queixo sobre o pan de molde co queixo fresco.

-Troceamos unha aceituna en dúas partes.

-Colocamos as aceitunas a modo de ollos sobre o pan de molde. 

2. Recanto da lóxica-matemática: Unha momia visitou o noso rincón e na súa visita deixou olvidadas algunhas das súas vendas. Recollemos as vendas, contamos cantas deixou atrás, e empregamos reglas para medir a lonxitude de cada unha delas. Anotamos sobre as vendas as medidas observadas na regla. Escollemos a venda máis longa para escribir o noso nome. Contamos as letras do noso nome e o dos compañeiros de rincón, quen ten máis letras? quen ten menos?

3. Recanto de achegamento á lectura e a escritura: Escribimos a palabra momia con lápiz e compoñémola empregando pegatinas do abecedario, selecionando as letras necesarias para completar a palabra plantexada. Identificamos cal e a letra que se repite e cantas veces o fai.

4. Recanto da autonomía: Levaremos a cabo un obradoiro de expresión artística na que o importante vai a ser a obtención do material necesario para a súa execución e a súa preparación. Necesitamos misturar auga e cola, recoller pinceles e vasos, preparar cartulinas e trocear papel de baño. Unha vez reunido e ubicado todo o material, comezaremos unha actividade onde sobre unha cartulina, craremos unha momia. Necesitaremos á súa vez colocarlle uns ollos, polo que empregaremos as técnicas do picado e o recortado.

Estes son algúns exemplos das actividades levadas a cabo na nosa aula. Aínda quedan por diante outras moitas.

Gracias pola vosa lectura e que teñades un máis que terrorífico SAMAÍN...

PROXECTO MUSICAL PARTE I (ABBA)

Comezamos o proxecto musical cun grupo mítico da música pop europea. Trátase dos suecos de ABBA.

Comezamos este pequeno proxecto adicado a ABBA coñecendo unha das súas cancións máis míticas... "Waterloo". Vendo o videoclip desta canción descubrimos que son 4 os compoñentes do grupo sueco, 2 homes e dúas mulleres, realizamos así a nosa primeira suma.
 Debuxamos os integrantes do grupo (repasando o esquema corporal), subímolos a un escenario a través dun obradoiro de expresión plástica, e compoñemos o seu nome con letras de pegatina.

Outra das cancións que coñecemos de ABBA foi "Chiquitita". A partir desta canción comezamos a traballar os conceptos de "grande" e "pequeno", facendo alusión tamén ás medidas intermedias, o concepto de "mediano". Levamos a cabo diferentes actividades impresas relacionadas con estes conceptos, e xogamos a clasificar e ordenar diferentes materiais segundo o seu tamaño. Clasificamos Matrioskas, pesos, palliñas, bolas...

 

PROXECTO MUSICAL (PRESENTACIÓN)

Comezamos un proxecto encamiñado a coñecer diferentes músicos, artistas, compositores, cantantes... do pasado e do presente. O proxecto iniciouse dende os fogares dos nenos e nenas da nosa aula. As familias foron as encargadas de aportar os artistas a través dos cales viaxaremos e nos servirán para seguir aprendendo.

Durante o desenvolvemento deste proxecto traballaremos os seguintes artistas:

1.RAPAHEL.

2.LUIS FONSI.

3.ESTOPA.

4.TINA TURNER.

5.PABLO ALBORÁN.

6.ENRIQUE IGLESIA.

7.MARC ANTHONY

8.JOHN HENRRIK FJÄLGREEN.

9.FREDDIE MERCURY.

10.ELVIS.

11.ESTRAWBERRY MILK

12.U2.

13.ABBA.

14.NIRVANA.

15.SHAKIRA

 Ó longo deste proxecto traballaremos diferentes contidos e coñeceremos distintos tipos de música, Pop, Rock, Suomi, K-pop...

ACHEGÁNDONOS Ó MUNDO DOS CONTOS POR PRIMEIRA VEZ...

Temos unhas cantas propostas para facervos sobre contiños que podemos utilizar para introducir a nenos e nenas do primeiro ciclo da Educación Infantil no mundo da lectura.

Estamos falando dunha fase na que podemos contribuir a que os máis pequerrechos se interesen por primeira vez polo mundo dos contos, e se acheguen así dende ben cedo á literatura. Para moitos serán de sobra coñecidas as obras citadas a continuación, pero para outros será "a súa primeira vez", si é que non se nace aprendido, e sempre hai cousas que se descoñecen, e para iso estamos aqui... para compartir.

DO BERCE Á LÚA (KALANDRAKA)

"Do berce á lúa" é unha colección de libros editados pola editorial Kalandraka. Son un total de 8 títulos os que compoñen esta selección. As súas ilustracións resultan moi potentes, simples e chamativas para os máis pequenos. Debuxos claros e cores rechamantes envolven as poucas palabras que compoñen o texto de cada páxina, texto redactado cun tinte poético.  Estes contos son obra de Antonio Rubio e Óscar Villán, e o seu prezo ronda os 7 euros por unidade.

COCODRILO

CINCO

 LUNA

VIOLÍN

  

ÁRBOL

MIAU

ZAPATO

PAXARIÑA DE PAPEL

CARACOIS (OQO)

Caracois é unha colección composta por un total de 5 co contos que teñen como nexo de unión a un caracol, o protagonista das 5 historias. A través destes pequenos relatos os nenos coñecerán as aventuras dun pequeno caracol e algúns dos seus amigos, Vermiño, Formiga e Caracola. 

Estes 5 contos son obra de Armando Quintero e André Letria. 

Oqo elaborou tamén diversos curto animados onde se da vida ó relatado nos cinco contos. 

 CARACOL E VERMIÑO

CARACOL E CARACOLA

CARACOL E FORMIGA

E ampliando a colección ...

CARACOL E SALTÓN

AMIZADE DE CARACOL

CONTO CINCO SENTIDOS (OQO)

Oqo editou no 2012 e despois do éxito de "Caracois" unha nova colección de libros dirixida ós considerados prelectores, os pequerrechos e pequerrechas de 0 a 3 anos. "Conto cinco sentidos" é unha colección de 5 contos onde se narran 5 historias diferentes. En cada unha delas un dos órganos dos sentidos será o protagonista.

Esta obra faise realidade grazas a José Campanari e Simona Malazzani. De novo, textos curtos, imaxes creativas e rechamantes, para centrar a atención do neno/a con gran facilidade.

TODO EL MUNDO VA... (EDELVIVES)

O indio vai, a princesa vai, a mamá vai... a onde irán?? "Todo el mundo va" é un conto editado por Edelvives baixo a autoría de Emilie Jadoul. Resulta ser unha obra moi efectista para a súa lectura ante nenos e nenas do primeiro ciclo da Educación Infantil. En poucas palabras, con debuxos moi simples e coloridos, este conto ten a capacidade de contarnos unha historia dunha forma moi sinxela. Este conta ensínalle ós nenos e nenas a ir ó baño, demostrándolles que... "todo o mundo vai".

PROXECTO SUOMI

Comezamos un proxecto sobre Finlandia... a razón? Pois temos unha fada na clase que fai moitos trucos e todos eles teñen un nexo común... as pompas de xabón. O profe contounos que as pompas de xabón están feita de auga e xabón... e como non nos acabamos de fiar... foi o primeiro co que experimentamos, sería certo que asi se fan as pompas de xabón?

O profe contounos que para que fosen pompas máxicas de verdade o que nos facía falta era poñerlle a mesma auga que a fada da nosa clase lle poñía ás súas pompas. A auga das pompas máxicas viña de moi pero que moi lonxe, dun país chamado Finlandia.

Dito e feito, fixemos un pedido a través da nosa fada e en poucos días chegou ó noso cole auténtica auga finlandesa.

Agora xa podíamos facer auténticas pompas máxicas coa auga de Finlandia.

Este país tan raro e lonxano espertounos un pouco de curiosidade... decidimos iniciar un Proxecto para coñecer Finlandia.

O primeiro foi pedirlle información ás familias, e coas cousas que nos aportaron procedemos a decorar a nosa aula. fixemos unha pequena exposición de fotos, pintamos bandeiriñas finlandesas e fixemos un cartel coa palabra SUOMI, aprendemos unha das primeiras cousas... os finlandeses falan diferente a nós, o seu idioma é o finés, e en finés Finlandia chámase Suomi.

Coa información aportada polas familias traballamos diferentes contidos como:

-A forma circular en referencia a forma xeométrica dos círculos.

-Analizamos a distancia entre o noso país e Finlandia, e trazamos unha recta entre ambos lugares.

-Coñecemos a Catedral Branca de Helsinki e comparámola co noso referente máis cercano a ese nivel, a Catedral de Santiago.

-Coñecemos un dos animais máis característicos de finlandia, os renos. Canda os renos descubrimos que en Finlandia e en concreto en Laponia vive un dos personaxes maís coñecidos a nivel mundial, Papá Noel. 

-A Aurora Boreal é un dos fenómenos naturais máis característicos deste país nórdico. Coñecemos a súa principal característica, as súas rechamantes cores, e representámola nun debuxo. Coñecemos unha fermosa lenda sobre a creación da Aurora Boreal, un raposo arrastra a súa cola mentras corre pola fría neve, do contacto da cola coa neve saltan centos de chispas de colores que forman este fermoso fenómeno. Representamos nun debuxo as chispas de colores con birutiñas de ceras de colores.

Elaboramos un mural no que imos recollendo todos os contidos traballados na aula. No centro representamos alguns dos aspectos máis característicos de Finlandia, o seu mapa, a súa bandeira, un reno, un patín, e un cubo cunha cana de pescar.

Completando o mural difernetes fotos coas palabras escritas polos nenos en castelán e finés. 

Neste mural recollemos fotos e palabras clave sobre finlandia, o esquí, os vikingos, rostros coñecidos como Raikonen... Esta composición vaise realizando pouco a pouco e co paso dos días.

Unha das cousas que máis nos gustou de Finlandia foi saber que os habitantes deste lonxano país teñen a posibilidade a causa do seu clima, de practicar multitude de deportes de inverno. Nós investigamos sobre o Esquí e o a patinaxe sobre xeo. Tivemos a oportunidade de patinar no corredor do noso cole, utilizamos cartóns para desprazarnos polo chan. Cun cartón en cada pé deslizámonos polo chan como si unha auténtica pista de xeo finlandesa se tratase.

Este proxecto sobre Finlandia sirveunos para coñecer algúns dos seus pratos máis típicos e adentrarnos no mundo da cociña. Realizamos dous obradoiros de cociña para elaborar por un lado pan negro e por outro Mammi, un postre típico finlandés.
Estes obradoiros de cociña servíronnos para iniciarnos na medición de cantidades, a escritura dos diferentes ingredientes necesarios para a súa realización, a repartición dos produtos elaborados entre diferentes número de comensais segundo a situación...

O proxecto anual do cole no presente curso lévanos a traballar co "Paso do tempo". Baixo esta temática lévase a cabo o desfile de entroido, onde nós nos imos disfrazar de Castrexos. Os castrexos tiveron algún que outro conflicto con un pobo bárbaro chegado de terras escandinavas... non eran outros que os Vikingos, algúns deles de terras finesas. Aproveitamos para coñecer os vikingos, as súas costumes, as súas casas, os seus barcos... e xa de paso, traballamos na confección do noso disfraz de castrexo para o entroido.

DENDE POLONIA CHEGOU E AQUI ATERROU

E porque non facer un proxecto sobre Polonia?? Imos deixar atrás aquelo de... "Unidad 1: El Cuerpo...", "Unidad 2: Los animales".... para facer algo que vaia máis aló, xa que, este tipo de ideas van a promover en primeiro lugar que os mestres teñamos que aprender para logo ensinar, e en segundo lugar... que os nenos aprendan a través de contidos totalmente diferentes os que adoitaban traballar.

Todo comeza coa visita de LANSKA... unha cegoña chegada dende Varsovia (Polonia), que ten moito que contar e que ensinar...


Despois de consultadas as familias e de pedirlle colaboración... estas apórtannos un mundo de ideas coas que comezar a traballar...

Sabías que... en Polonia descrubíronse algúns dos restos de dinosaurio máis antigos do mundo mundial??... xa temos por onde comezar.

Todo estará previamente preparado. No areeiro do noso cole espérannos auténticos osos de dinosaurio soterrados. Antes de comezar investigamos sobre unha profesión un tanto peculiar... a de PALEONTÓLOGO, que fan? que utilizan?? Cunha pequena idea sobre que fan estes profesionais e armados con cascos, palas e cubos saímos ó areeiro. Alí atoparémonos unha zona acotada e delimitada... onde están os osos de dinosaurio. Os nenos e nenas por turnos accederán á zona acotada para buscar osos. Levaremos a conta de quen encontra e cantos atopa, e anotarémolo todo nunha táboa de rexistro. Faremos comparacións entre as dimensións dos osos atopados, traballando así nocións básicas de tamaño como... longo, curto, grande, pequeno... Poderemos axudarnos tamén dunha regra para medir e anotar o tamaño das diferentes pezas atopadas.

A temática dos dinosaurios dou para traballar durante varios días consecutivos, fixemos varios obradoiros, un para elaborar máscaras de dinosaurio aproveitando a cercanía do Entroido, outro no que con material de refugallo fixemos dinosaurios nos que estampamos o noso nome, fixemos puzzles coñecendo diferentes especies de dinosaurios, e revivimos de novo a experiencia de convertirnos en paleontólogos, desta volta a pequena escala na aula, cunha caixa chea de area e osos.

Sabías que... a capital de Polonia chámase Varsovia??
Daremos un paso máis no noso proxecto e descubriremos Varsovia, unha fermosa cidade de Polonia. O primeiro que nos chama a atención despois de empregar diversas plataformas de internet para coñecela, é colorido das súas casas. Decidimos facer un mural representando as casa típicas de Varsovia, e depaso... debuxamos e pintamos as nosas casas da nosa pequena vila. Cun pouco de traballo creamos na aula un pequeno planeta composto por dous lugares, Varsovia e a nosa Vila.

De Varsovia aprendemos algunhas cousas moi curiosas e todas elas as poñemos en relación co noso contorno máis cercano... a nosa vila. Varsovia ten a Sirenka unha fermosa serea que defende as súas rúas, pois nós na nosa vila temos nunha das súas prazas a Valle-Inclán o cal visitamos e contamos xunto á súa estatua un total de 12 libros.
Varsovia ten un parque chamado Lazenki... pois a nosa vila ten unha alameda das máis fermosas da comarca.
Varsovia ten... unha praza que se chama a Praza do Palacio do Rei, porque alí hai un palacio onde viviu un rei... pois a nosa vila ten unha praza que chamamos Praza Maior... alí non hai palacio pero si hai moito sitio para xogar coas nosas bicis e os nosos patinentes.

Sabías que... en Polonia hai un deserto que se chama deserto de Bledow?

Resulta que en Polonia teñen o seu propio deserto... quen o ía dicir... Pero imos por partes, o primeiro foi pensar que era aquelo dun deserto pois... tan só temo 3 anos e ainda non o tiñamos moi claro. Despois de pensar, investigar e ter as ideas claras empezamos a traballar organizados por pequenos grupos que rotarían por un total de 3 actividades.
Na primeira das actividades tiñamos que escribir o noso nome en area, empregando unha caixa con area e un pau. Despois de escribir o nome tamén tivemos a oportunidade de debuxar aquelo que desexaramos tamén na area.
Outra das actividades sirveunos para descubrir os "cactus", unhas prantas incribles que habitan os desertos. Fixemos a nosa propia plantación de cactus e diseñamos unhas etiquetas para identificar perfectamente cal é o noso "cactus" ó remate do proxecto e poder levalo para a casa.
Por último, a terceira das actividades foi unha actividade impresa na que tiñamos que recoñecer a imaxe correspondente a un deserto, identificar as súas principais características, e escoller as cores axeitadas para poder colorealo en asociación a un deserto real. 

Sabías que... Polonia é un dos maiores consumidores de mazás do mundo?

Ós polacos encántalles comer mazás... é unha das curiosidades que traballamos na aula durante o desenvolvemento deste proxecto. Durante uns días as clases tiveron como protagonistas as mazás. Todo comezou cando Lanska a cegoña polaca, nos trouxo dende o seu pais natal unha bolsiña chea de mazás. 
Coas mazás fixemos moitas actividades diferentes entre as cales podemos destacar... pintar e estampar coas mazás en diferentes superficies e con diferentes cores. Tamén troceamos mazás e repartimos entre os nenos bandeiriñas con diferentes números. Os nenos/as tiñan que confeccionar pinchos de mazá atendendo ó número indicado na bandeiriña para saber cantos anacos debían poñer. Este pinchos tan saudables foron degustados na posterior hora da merenda.

Recapitulemos entón cales foron os contidos traballados e as actividades realizadas:

1.Un dinosaurio polaco:
-Búsqueda de osos no areeiro do cole.
-Conteo do número de osos atopados por cada neno/a.
-Medición de osos con regras.
-Comparación dos tamaños dos osos e manexo de unidade básicas de lonxitude.
-Coñecemento do oficio de Paleontólogo, búsqueda de información a través de internet.
-Composición de puzzles de dinosaurio.
-Realización dun obradoiro de máscaras de dinosaurios.
-Composición dun dinosaurio a partir de material de refugallo.

2.Varsovia, unha fermosa cidade polaca:
-Recoñecemento dalgún dos recunchos máis  recoñecibles de Varsovia: Sirenka, Parque de Lazenki e Praza do palacio do Rei.
-Recoñecemento das principais rúas, prazas, xardíns e manumentos da nosa vila.
-Debuxamos as nosas casas.
-Compoñemos a nosa propia vila e a nosa propia cidade, recoñecemos ambos términos e diferenciámolos. A vila é máis pequena que a cidade.

3.O deserto de Bledow.
-Coñecemento da principais características dos desertos.
-Coñecemos unha nova especie vexetal, os "cactus".
-Plantación de "cactus".
-Escritura e debuxo en area.

4.Ricas mazás polacas.
-Clasificación de mazás segundo o seu tamaño e a súa cor.
-Conteo de mazás, numeración e achegamento a nocións básicas de cantidade (máis, menos, igual).
-Elaboración de pinchos con anacos de mazás atendeno a unha cantidade previamente establecida.
-Degustación dunha merenda saudable: pinchos de mazá.

O desenvolvemento do Proxecto sobre Polonia estivo acompañado doutras moitas actividades como...
-Degustación de doces para celebrar un dos días máis característicos do entroido polaco.
-Coñecemento dalgunhas palabras en polaco.
-Caixiña de Polonia: Caixa viaxeira que os nenos levaron para a casa e onde podiamos atopar diferentes recursos ludicos relacionados co traballado na aual, puzzles, fotos, debuxos...

Como ferramenta que nos permite comunicarnos coas familias e darlles a coñecer todo canto estamos traballando na aula... contamos coa "Caixiña polaca". Trátase dunha caixa que contén diferentes actividades coas que os nenos/as poden ensinar na súa casa todo canto aprenden no cole. As actividades recollidas dentro da caixiña son:

-Colorea as bandeiras coas cores que lle corresponden.

-Compón os puzzles e relaciona cada un coa súa palabra.

-Identifica as imaxes de diferentes lugares e indica onde están.

Ademáis a caixiña contén unha postal e unha boneca típicas de Polonia aportadas por unha familiar que recentemente viaxou a Polonia.

Añadimos ademáis algúns recursos para traballar "Polonia" na vosa aula.

Ós neno resultaralles moi chamativo aprender algunhas palabras en polaco, este video de animación ensínanos a dicir en polaco palabras como can, gato ou peixe.

Este curto de animación serviranos para dar a coñecer ós nenos e nenas nomes típico polacos, como se chaman os nenos de Polonia? Incluimos estes nomes nas nosas asambleas, a cada neno da aula outrogaráselle un nome polaco. Durante a asamble os nenos deberán facer referencia ó seu nome propio e ó seu nome polaco.